2017年1月31日星期二

【周末好天氣】銅鑼灣海景Brunch好位置!

趁好天氣同朋友嚟個海景Brunch
嚟到銅鑼灣Les Saveurs Private Kitchen,望出去就係紅隧口,天朗氣晴日子可以由東至西見晒成個維港景!



餐廳本身係開放式,不過裝有流動層板,想要多啲私隱都輕易安排到唔同大小嘅廂房。

先嚟個麵包籃,好精緻嘅法包同牛角飽,好鬆軟香脆,唔塗牛油都好好食!
Menu有啲係法文(!?) 唔緊要!店員會貼心地先解釋再落order

留意返,店入面嘅碟有幾個動物款式,又幾Kawaii

頭盤每人選一款,炸蝸牛波波加上香芹蒜蓉牛油好惹味,賣相有點分子料理嘅感覺。
另一款頭盤係象拔蚌,質感夾口,一啖放入口好滿足,仲有西洋菜泡沫,配搭沙律菜都好好味。

主菜我選咗42度煙燻三文魚(+$88),上菜嘅時候用玻璃蓋冚住,喺客人面前繼續煙燻,大概兩分鐘後店員打開個蓋,走出嚟嘅煙燻效果勁Artistic

煙燻三文魚配搭黑魚籽感覺勁華麗。切開慢煮三文魚,肉質油潤鮮嫩,滑到不得了!配鹹香黑魚籽,鮮味出晒嚟!

醬汁用上紅菜頭蓉,旁邊仲有幾粒蘋果辣薑汁啫喱,又幾清新喎!

另一款主菜選咗龍蝦天使麵,主角除咗龍蝦肉之外,仲有龍蝦Cappuccino包住天使麵,每條天使麵都索晒鮮甜龍蝦汁,不過份量偏少,真係唔係幾夠喉!

之後到是日餐湯—雅枝竹忌廉湯,店員先上一隻吉碟(!?)

再以茶壺即席倒出熱嘅忌廉湯,飲嘅時侯將伴碟嘅雅枝竹脆同乾火腿拌落去一齊飲,忌廉湯打得細滑,餐湯每日都唔同架!


甜品方面,檸檬蛋白撻賣相好靚,檸檬味道清新,配搭雜莓雪芭酸酸甜甜效果好夾。
另一款係朱古力慕絲蛋糕,朱古力味好濃,配搭同樣香濃朱古力雪糕,朱古力Lover一定大愛!
兩款甜品,一個輕怡一個重口味,任君選擇,甜品迷都唔會失望!

法國菜當然要慢慢享受,同朋友嚟慢慢傾絕對可以令人放鬆心情,而且午餐四道菜只係$238,食呢個景+法國菜絕對超值!


是次小分享完畢,有興趣可按 麵語錄aminn 本站內其他分享 :)

Aminn | Beauty.Food.Fun.Travel.Trendy| 
任何合作請接洽aminn613@gmail.com

2017年1月30日星期一

【集郵好去處】香港動漫海濱樂園(金紫荊廣場)

今年新年天氣好和暖,早排路過會展行到金紫荊廣場,原本遊客好多嘅地方已經好多人,發覺原來會展海旁擺放咗好多唔同年代嘅本地動畫卡通人物!

香港動漫海濱樂園位於灣仔金紫荊廣場旁邊嘅海濱長廊,設有30組新舊本地創作漫畫人物雕塑,每個身高大約1.51.8米,真係成個人咁高!包括老夫子、步驚雲、聾貓、癲噹、老少女、馬仔、港女老婆(咳神)等多個香港漫畫角色。

園區有好多本地漫畫主角同有趣漫畫對白:同同癲噹喺「叮叮」Selfie、聾貓&大泥白熊打麻雀等 、體驗港式擦鞋以及「跳飛機」,係屬於本土嘅動漫地標。

香港動漫海濱樂園簡介
在維多利亞港前,跟香港經典動漫角色玩自拍,就算您不是動漫迷也會大呼過癮! 20164月開幕的香港動漫海濱樂園,坐落於金紫荊廣場旁邊,以自拍為主題。樂園展出了30個本地原創動漫角色的塑像,(包括老夫子、步驚雲、王小虎、丁丁企鵝及聾貓等),還有多個充滿地道特色的香港動漫場景。您可以隨時變身動漫中的一角,與有趣角色「打麻將」,或是坐上香港獨有的叮叮電車,體驗港式「擦鞋」及「跳飛機」遊戲等,當然少不了跟這些動漫角色合照、「打卡」留念啦! 想繼續探索香港動漫文化?您還可以前往同樣位於灣仔的「動漫基地」參觀 。「動漫基地」的地址為灣仔茂蘿街7號。
詳情:https://www.anicompark.hk

30個本地原創動漫角色:1. 步驚雲;2. 王小虎;3. 牛仔;4. 老夫子;5. 13點;6. 中華英雄;7. 咳神;8. 陳浩南;9. 李小龍;10. 壽星仔;11. 陳洛軍;12. 森巴;13. 白熊和男孩;14. 海虎;15. 雪晴;16. 老少女;17. 聾貓;18. 燎原火;19. 馬仔;20. 郭靖;21. 荊裂;22. 阿狗;23. 癲噹;24. 哨牙珍;25. 南宮問天;26. 許樂;27. 特務K28. 龍神;29. 丁丁企鵝;30. Q小子

是次小分享完畢,有興趣可按 麵語錄aminn 本站內其他分享 :)

Aminn | Beauty.Food.Fun.Travel.Trendy| 
任何合作請接洽aminn613@gmail.com

2017年1月23日星期一

【新派上海菜】軒尼詩的「手製拉麵」

無心插柳遇到軒尼詩的江南 上星期原本出灣仔食上海菜放題,中間遇到一啲事,陰差陽錯路過好久以前嘅壽司鋪已經華麗轉身成為上海菜,見到門面幾乾淨就走咗入去,裝修幾光猛,一入去見到中間張bar枱,不過入面無乜人!

睇下個餐牌,基本上海蘇杭地道食物都有,拉麵、包點、小食同小菜,餐牌註明會用上「手製拉麵」!
門口入嚟就見到師傅喺度拉麵同整小籠包。

最喜歡點拼盤,啱晒想試晒唔同口味嘅我!
最後點咗醉雞、醉豬手同雞絲粉皮。酒味尚算可以,醉雞肉質唔鞋,尚算滑溜。豬手就未夠入味,不過豬皮夠厚夠爽。雞絲粉皮其實無乜特別驚喜,已經係喺街食到比較好嘅雞絲粉皮。

而個擔擔炸豬扒麵呢,炸豬扒係另上嘅,炸得幾乾身,豬扒剛剛炸起仲算juicy,放涼咗就開始乾。
呢度嘅手製拉麵有驚喜,係師傅即場拉嘅拉麵,麵條口感好好,唔敢講好彈牙但有咬口唔係淋身。仲有擔擔麵個花生麻醬,加咗辣味咁先夠蘇杭嘛~不過略嫌湯底唔夠厚身。
But手製拉麵必食!

食上海菜又點少得小籠包?
姥姥小籠包皮夠薄,肉餡夠鮮甜不鬆散,不過可能湯汁唔夠,未夠飽滿感。

話說Aminn好鍾意食葱油餅,見呢個圓碌碌咁趕緻就叫咗,點知一咬之下咁厚皮嘅?其實佢真係好似Donut咁,將蔥餡集中咗喺中間,油蔥勁香勁濃郁!不過呢,Aminn都係喜歡較乾身嘅葱油「餅」。

以灣仔人來人往嘅軒尼詩道嚟講,假期一點左右已經開始等位,而且上海姥姥勝在大眾化價錢坐得舒適,真心抵贊!

是次小分享完畢,有興趣可按 麵語錄aminn 本站內其他分享 :)

Aminn | Beauty.Food.Fun.Travel.Trendy| 
任何合作請接洽aminn613@gmail.com