2022年8月7日星期日

【MirroRorrmiWeare】如不安伴你經過 便能硬朗 — MIRROR《ONE AND ALL》

承上一篇 【呢單嘢唔係我跟開】Mirror 2022演唱會事故 責任誰屬:大國文化?MakerVille?藝能?菱藝?協興隆?ITP?紅館?康文署?機電署?,又一星期過去,「唔係鏡粉」嘅我心情相對平復咗好多,但難免有時諗起或者同朋友講起都仲係會心有一沉。
喺時候要諗下Viu系嘅Fans可以做啲咩,令支持嘅藝人同其他表演者繼續走落去!

無可否認鏡仔由造星行到今時今日嘅成績真係多得ViuTV,Mirror、Error、Collor、連「御用dancer」好多都係來自「造星」,不過佢哋個人嘅努力亦唔可以抹殺,真心需要大家嘅團結去支持佢哋!

真心過去幾年佢哋帶俾好多人快樂,所以而家到佢哋喺困難入面,唔係鏡粉都會想撐住佢哋!

今個星期鏡仔相繼出post,似乎Fans可以放低少少心頭大石,不過recover真係唔係一時三刻做到嘅事..

我地就用自己嘅能力去撐住Mirror,仲有Mo、Fung、Zisac,一定要返晒嚟!👊🏻
#MirroRorrmiWeare

———————

《Wave.》專題:
如不安怎樣經過 — MIRROR 演唱會意外後,鏡粉的創傷與行動

意外發生後,整個「鏡圈」好像靜止了,面對突如其來的悲劇,中間的情緒變化,似乎也體現於近兩星期 Spotify 的歌曲數據上面。

MIRROR成員的Solo歌都出現同一趨勢:演唱會前開始上升,到意外翌日急跌一至三成,再過一兩天才慢慢回升。唯一例外是團歌〈One and All〉,演唱會期間每日播放不足 4,000 次,但8 月 1 日升至近 2.7 萬次。

〈One and All〉MV:https://youtu.be/FvS4Ny4aW3Q
#如不安伴你經過便能硬朗

———————

繼23位Dancer聯合發出聲明之後
早幾日有鏡粉就開個新IG @safe_show_for_mirror_and_all
為咗專注監察今次事件嘅發展
同希望為12子同埋所有表演者爭取返應有權益 

4項訴求詳情如下:

1、除了因事件進入法律程序不可交代的細節以外,MakerVille仍須正式向大眾交代因事故受害表演者的身心支援以及保障其生計的具體方案。
 
2、我們要求PCCW Limited、MakerVille、大國文化承諾,制定具體方案,改善旗下全職及合約藝人與員工在工作上的福利及保障(包括卻不限於:讓所有員工有足夠的休息時間,為他們添購買保險等);確保他們將來的演出及活動,都有安全的場地環境,得到足夠的勞工保障。
 
3、我們要求政府相關部門承諾改善康文署轄下大型表演場地(包括香港體育館及伊利沙伯體育館)大型表演舞台的租用、管理及審批程序的系統性問題,從根本上保障表演者以及市民的安危,協助業界發展,防止再有同類悲劇事故發生。
 
4、我們要求是次演唱會舞台之涉事公司(包括卻不限於:藝能、協興隆等)主動承擔工程技術監管失誤的責任,停止相互推卸。

2022年8月1日星期一

【呢單嘢唔係我跟開】Mirror 2022演唱會事故 責任誰屬:大國文化?MakerVille?藝能?菱藝?協興隆?ITP?紅館?康文署?機電署?

利申,我係錯粉,由《花姐Error遊2》開始鍾意Error、花姐、Viu節目……

筆者寫呢篇文章嘅時候已經係Mirror演唱會事故發生之後第3晚嘅半夜時分,相信大家呢個weekend都係好鬱悶咁過去..

事情已經發生,堅持追究之餘亦要繼續支持香港嘅表演者!

入返正題,究竟個show邊度出事?邊個要負責?大國文化?MakerVille?藝能?菱藝?協興隆?ITP?紅館?康文署?機電署?
呢幾日所有涉事嘅公司「統一口徑」都係話 #呢單野唔係我跟開!Fine~新香港就係咁,而我哋知道所有單位都關事......SO??


意外,就係意料之外,SO今次事故絕對唔係意外,係人為、係疏忽!

今次最傷透鏡粉/造星fans/Viu支持者嘅心一定係MakerVille莫屬,由演唱會賣飛嘅分段式「內循環」捆綁銷售、MIRO「優先」課金、「Android專用」網上演唱會、貴價手燈(唔包電芯)等等,務求玩到死忠鏡粉氹氹轉,連唔係鏡粉嘅我都難免好想「問候」一下 李澤楷


好啦無論MakerVille幾仆街都好,the show must go on,全城期待嘅Mirror首個紅館演唱會,就由演唱會開show前一晚班Dancers爆出有Production (即係監製)嘅「執生論」(嗯,好一個「揸住雞毛當令箭」嘅Producer ),谷到要集體表達即係表示現場係危機重重!而當時局外人都唔知當晚係表演者嘅第一次「踩台」綵排!

第一場之後大家終於知道發生咩事,每晚開show前歌迷同表演者嘅希望都只係「所有人平安渡過」,其實根本無人enjoy the show..

單單由觀眾拍到嘅短片見到,第一場有AK嘅震台、12子嘅吊吊揈吊橋;第二場有Frankie差啲跌落2米深三角窿;第三場花姐親自坐panel好似冇乜事發生;然後第四場就沒然後..

過咗一個weekend內心依然憤怒,我敢講大部分人對件事嘅憤怒係蓋過唔開心,喺《MIRROR.WE.ARE》之前無人會想像到香港做嘅演唱會可以做到幾19,仲要越揭乞衣,成個演唱會由上而下都係人渣中嘅人渣!尤其是原來大國文化一直收埋咗嘅《MIRROR.WE.ARE》演唱會總監—大國文化藝員及演藝項目總經理 Karen Li,計返職場食物鏈其實演唱會監製Fran9同經理人花姐都只係兩舊大啲嘅Potato。

「樂觀地悲觀」都係我做人嘅宗旨,除咗為阿Mo (李啟言) 集氣,仲有繼續關注阿峯 (張梓峯)、Zisac (羅德智) 同一班周身傷嘅Dancers,亦要同Mirror打氣,但係呢啲都唔實質。作為旁觀者,現時真正幫到一班表演者就係俾空間佢哋身心復原,而我哋喺外邊就要團結,為傷者同表演者取回公道,認真要同大國文化MakerVille、藝能等等班仆街講「而家唔X你幾時X你啊!」

批評就唔再多講喇~
喺度分享幾篇我好認同嘅post。香港人,共勉!


杜汶澤:
仇恨不會醫好受傷的人,現在最重要人無事,但追究責任是繼續走下去的第一步!畢竟這個演唱會,不是第一天發生意外,如果之前有好好面對,今天情況又會否一樣呢?

王貽興:
如果繼續咁樣盲目支持果間電視台,其實係支持緊佢哋繼續用呢種模式去擴大,去發展,去榨乾榨盡旗下藝人,用最低成本,將藝人用最短視最慳皮嘅方式消費淨盡,佢哋係咪捱殘,情緒有冇問題,係咪身心疲累,仲會唔會再一次當眾暈低,無論係咪佢哋嘅粉絲,都冇人想再見到呢啲咁令人心痛心酸嘅情況發生。

《MIRROR.WE.ARE》演唱會23位Dancer聯合聲明:
一) 不會接受任何傳媒採訪,強調絕不會發放任何匿名留言。
二) 受傷的三位舞蹈員的健康狀況只由本人、其家屬或官方單位發放的訊息為準。
三) 沒有為傷者發起眾籌。
四) MIRROR 12子與我們均賣力演出,此刻與我們一起共渡難關,請勿將責任歸咎於該演唱會任何一位表演者。