2018年4月30日星期一

【多重營養】特選有機野菜粉 每日保腸道健康

喺香港生活最方便就係出街食飯,好多時都係多肉少菜,咁樣好難達至營養均衡,無論喺大人定小朋友都好容易導致偏食、便秘嘅情況!
原產地來自日本嘅15特選野菜粉一包已經含有15種優質嘅蔬菜精華,提供多種微量元素(維他命、礦物質等)同埋豐富嘅膳食纖維,每日一包輕易解決吸收蔬菜不足嘅問題。除咗可以補充營養所需,野菜粉進入腸道之後會產生天然酵素,有效改善消化吸收同腸道健康,仲可以增強免疫力、減肥修身、抗衰老等等,幫助到唔同身體所需。


15特選野菜粉嚴選日本九州15種有機蔬菜,包括新鮮苦瓜、圓白菜、胡蘿蔔、西蘭花、小松菜、蘆筍、牛蒡、羽衣甘藍、荷蘭芹、蘿蔔葉、南瓜、芹菜、菠菜、白蘿蔔、大麥若葉等等。以日本最先進嘅自家獨特技術,將新鮮蔬菜不經任何烹煮,由頭到尾,連根帶皮微粉碎,達致保存新鮮蔬菜原有營養。

呢種技術可以讓蔬菜粉容易直接溶於冷熱水,而當中營養唔會被破壞。而且不經烹煮嘅蔬菜含有酵素,有效喺人體入面產生化學作用。

野菜粉以密封嘅獨立包裝,方便攜帶,而且味道似抹茶好易入口,可以按個人喜好加入到唔同飲料或者食物入面。開始加固嘅BB已經可以食,懷孕同長者都可以食。 我就將野菜粉放咗喺公司,間中沖一杯當抹茶嚟飲,或者加入麥皮,最啱我呢啲要減肥嘅人,百變口味真係好大幫助!

建議份量: 嬰兒(加固後)、兒童:每日1包 孕婦:每日2包 成年人及長者:每日1-2包,有需要可加到3-4包 而家可以到 http://15green.com.hk/product-page 用88折就訂購到(旅行裝除外),如果大家有興趣試下,記得到專頁Inbox問我拎優惠碼啦!



是次小分享完畢有興趣可按 麵語錄食玩遊記 by Aminn 或 C家重地 其他分享 :)

Aminn | Beauty.Food.Fun.Travel.Trendy| 


麵語錄食玩遊記 by Aminn (Lifestyle)



C家重地 (Parenting)
www.facebook.com/sy.lam.family

任何合作請接洽aminn613@gmail.com

2018年4月23日星期一

【孕記重溫】聖保祿醫院順產生B記(3):住院篇

上篇講到因為我要催生,但係子宮頸又開得太慢,最後我都係用咗無痛分娩,Aster喺我穿水之後12個鐘就出咗世啦!

跟住主診醫生就好細心地幫我縫傷口,同一時間姑娘即刻幫BB簡單清潔再用大毛巾包住佢,然後就畀我哋抱下影相。

另一個姑娘就同清潔姐姐極速收拾同清潔房間,產房好快就回復返原本個樣,而產後係需要喺產房休息兩個鐘先可以離開(由BB出世時間計),因為我電話已經畀我玩到無電,所以唯有瞓覺。。。

兩個鐘頭之後已經7點半,我餓咗大半日終於有飯食!生完仔真係好肚餓,我食晒二人份量嘅飯餸!!

另外聽講好多媽媽生完之後去第一篤VV有啲困難,可能因為啱先打搞過陰道同有傷口,不過我完全無問題,自己去到仲要頭兩篤都痾咗1L!過嚟傍住我去廁所嘅姨姨表示驚訝!

喺St.Paul每晚6-8pm都係親子時間,生完第一晚太晏無得見lu~不過我住43夜,仲有兩晚可以見,親子時間係畀BB嘅爸爸媽媽過嚟抱BB同餵奶,不過媽媽任何時間都可以過去BB房,所以親子時間都係爸爸嘅餵奶實習班,媽媽就負責影相!XD






不過講到餵奶,BB房本身定咗每4個鐘餵一次,媽媽可以按時間到BB房餵人奶/水奶,或者由姑娘餵水奶,BB房姑娘除咗照顧BB之外,仲會協助新手媽媽餵人奶同抱BB



親友想嚟探媽媽就好方便,8am-10pm隨時都可以過嚟

反而想見BB就有時間限制,一係喺每日朝早同黃昏嘅探BB時段隔住玻璃「睇」
一係喺餵奶時段同媽咪一齊留喺病房餵奶先有得睇,不過講真返到屋企大把時間睇啦!XD


每朝早同晚,主診醫生都會同姑娘一齊過嚟檢查傷口同子宮復原情況,仲會解答我一啲產後嘅疑問。而兒科醫生亦會早晚過嚟匯報BB嘅唔同狀況同表現(例如痾咗幾多次屎尿
、食咗幾多奶等),估唔到一生完就要經歷「家長日」。。。


基本上我生完BB頭兩日都食得走得好happy,係下腹斷斷續續有啲M痛嘅感覺,因為子宮收縮返原本大小需要一段時間,而不適大概會維持一星期。反而第三日我因為塞奶好痛
好痛所以好唔舒服,夜晚差啲瞓唔到,本身醫生開定畀我for傷口嘅止痛藥就大派用場。。。


St.Paul
嘅病房,無論係4人、2人定單人病房其實間房都係一樣裝修,只係房入面有幾多個床位。至於
喺私家醫院生仔嘅價錢因人而異,幾間私家醫院嘅基本收費出入不大,都係包括住院、藥、食物(早餐),反而另收費嘅主診醫生、兒科醫生、麻醉師嘅費用就會有出入,幾多錢埋單真係要睇你選擇嘅醫生,如果住普通病房大概預6-8萬。(最新收費可以上網搵搵「本港私家醫院收費」)


講到無痛分娩,如果我一早已經決定做就直頭唔使等唔使痛啦!
唔好處當然就係要打麻醉囉,好處就梗係既方便又快捷,唔止等生嗰幾個鐘可以hea,連生之前剪會陰同生完縫針都無乜感覺,相對唔同生產方式應該算最舒服


同其他私家醫院一樣St.Paul都會有初生BB相連CD送返畀你,不過St.Paul應該係出世第一日(即係幾個鐘內)就被迫影咗。。。睇返Aster個發水厭世樣真係。。。



生仔後感:
*穿咗水係要盡快趕去醫院,但係唔代表好快就生到
*打咗催生唔代表即刻或者好快催到BB出嚟
*忍住陣痛就會令肌肉緊張,宮頸仲難開。。。(即係覺得痛就盡情表現情緒吧!)
*姑娘教落:
生仔唔係講有幾痛,係要睇開咗幾多度!(長知識呀!!!)

後記:
懷胎十月其實只係湊仔之路嘅開始,每日餵奶、換片、沖涼、換衫、氹瞓覺,產假每一日都係非常充實,如果屋企無工人姐姐或者陪月姨姨更加係手忙腳亂,歡迎大家一齊加入
湊B大挑戰!



(完)




是次小分享完畢有興趣可按 麵語錄食玩遊記 by Aminn 或 C家重地 其他分享 :)

Aminn | Beauty.Food.Fun.Travel.Trendy| 


麵語錄食玩遊記 by Aminn (Lifestyle)



C家重地 (Parenting)
www.facebook.com/sy.lam.family

任何合作請接洽aminn613@gmail.com

2018年4月12日星期四

【孕記重溫】聖保祿醫院順產生B記(2):生仔篇

上篇講到我8點幾到病房,9點幾就開始無所事事玩電話,老公就返屋企幫我拎「走佬喼」。。。

無耐主診醫生就嚟到幫我檢查,話因為穿咗水,下晝就生㗎啦!我心諗真係好,速戰速決呀!點知11點幾姑娘就嚟叫我入產房!下?我生得呢咩!?
(之前見其他媽媽嘅分享,可能因為喺公院,明明要開到成7度或者就生得先推入產房,等我以為自己中午就生得so happy。。。)
「產房」入面仲有好幾間產房,入到去原來都係一間病房咁嘅樣,有床同電視機,仲有獨立廁所,仲有姑娘嘅工作枱同好多櫃,完全唔會感覺冷冰冰。


去到產房首先就要換手術件袍(即係去照X光嗰啲後面挷繩嘅袍),由於我朝早仲未便便所以第一件事就要去通便。。原來只係唧一支液體萬甘油入去,忍一忍痾返出嚟,便意真係隨之而嚟her her聲就痾咗!!

之後就上床,待產其間姑娘會keep住同你對名、量體溫、量血壓、胎監(check宮縮指數同聽胎心跳)同檢查子宮頸開咗幾多。settle好之後就打催生(吊鹽水咁滴滴滴滴滴),其實喺未入病房之前已經喺手板面開咗個針口(種豆)打抗生素,之後打催生、止痛藥都係嗰度輸入就唔需要每次都吉支針啦!

跟住就係等老公同主診醫生返嚟,暫時無乜感覺。其實叫老公入嚟陪產其實都係一齊玩下電話同吹下水有人陪下無咁悶,哈哈!
打咗催生之後無耐就開始有啲較強嘅M痛感覺,好彩細個已經有M痛經驗,姑娘再check已經2度啦yes!我哋兩個喺產房唯有繼續等BB嘅來臨。。。
其間老公問我肚唔肚餓,佢話驚我無食嘢無力生喎!唉。。呢個時間嗱嗱聲痾咗出嚟先啦仲食乜鬼!!(無論咩年代生過仔嘅人都會好認同!)



兩個鐘過去,宮縮越來越強烈,終於要order支笑氣。之前產檢時主診醫生其實講過笑氣無用,叫我考慮無痛分娩,當時其實我無理會,因為自己想盡量用最天然方式生一次。亦聽人講過聞太多笑氣會好wing,所以我起初聞嘅時候都無聞好多,結果真係無咩用,唯有認真咁去聞下笑氣,應該由意會到宮縮嚟就要深深吸一下,之後痛緊就慢慢呼,試咗一陣之後真係好頭暈,我都唔知係聞到暈定係攰到有啲頭暈,總之就叫老公幫我拎杯暖水嚟飲下同按頭佢終於有嘢做!,當時宮縮已經強咗好多,不過仲叫死忍都忍到嘅。

呢個時候姑娘又檢查,仲係得2度!WHAT!?姑娘就問我會唔會考慮打止痛針或者做無痛分娩,喺宮縮加頭痛嘅情況下叫我點諗嘢!?當時每次陣痛到最深嗰下真係堅痛嘅,我就問姑娘其實要到幾痛先生得?(之前姑娘講過生嘅時候宮縮指數係百幾度,我頭兩個鐘已經過晒100!)姑娘就答我:「生仔唔係講有幾痛,係要睇開咗幾多度!!」「你喺度死忍咁緊張咪仲開唔到!」嘩~真係人生大道理呀!


當刻要盡快答姑娘
唔要,咁都真係幾痛就要啦!喺等緊姑娘拎止痛針過嚟嘅時候再諗下姑娘嘅說話,我幾忍得都好,而家先開得2度,真係唔知要等到幾時先開到10度,而且我又打咗催生一陣食全餐咪仲無癮,所以最後都係做埋無痛啦!不過即刻搵麻醉師都要時間,又要等多一粒鐘。


講到無痛分娩,入針嘅情況同開刀
一樣,感覺比想像中簡單,雖然知道支針係長長嘅,不過背住咗睇唔到,專心去冷靜自己好快就搞掂!需時耐少少都只係10秒8秒,入針個感覺其實唔覺點痛,反而係入完針打麻醉劑入去嗰時下背會有啲谷同涼嘅感覺,但係都唔會點痛,好快就無痛嘅感覺㗎啦!


無痛其實只係止咗痛嘅感覺,下身仲郁到㗎!打完無耐姑娘再check已經7度!!真係唔痛之餘仲放鬆晒,嘩力都慳返呀頂!!呢個時候連電話都玩到無嘢好玩,whatsapp埋屋企人講我終於就生得,跟住就瞓下(今朝6點就起身呀!)

等到5點主診醫生終於嚟到,兩個姑娘就分工幫醫生穿手術袍、將產房張床變身做「生仔床」,幫我陰道口外面脫毛,我嗰刻終於開始有啲緊張,我真係要生仔啦!!!

好多人以為打咗無痛就會無感覺,其實BB經過陰道(盤骨中間)出嚟嘅時候入面會有墜落去嘅感覺(就係要push嘅時候),總之一宮縮
下面就會好谷好谷,就係BB出嚟嘅時候,吸一大口氣hold住,再痾出嚟,簡單嚟講的確係用痾屎道力,但係要keep住痾晒成段谷嘅時間(大概8-10秒),醫生仲讚我叻,又話見到頭啦(但係次次push完都話見到頭囉!)最後push45下左右就真係出咗頭啦,之後畀多12次力突然間醫生定姑娘就抽咗個BB出嚟舉高(畀我哋睇)BB喺半秒內就哇哇大喊,跟手姑娘喺另一個半秒就將BB放到我心口,由於事出突然,加上第一次見到啱啱出嚟嘅BB,我真係有啲不知所措,就係咁Aster就喺5點半出咗世啦!



同場加映:我哋
第一張全家幅

正常版
搞事版

(續)



是次小分享完畢有興趣可按 麵語錄食玩遊記 by Aminn 或 C家重地 其他分享 :)

Aminn | Beauty.Food.Fun.Travel.Trendy| 

麵語錄食玩遊記 by Aminn (Lifestyle)



C家重地 (Parenting)
www.facebook.com/sy.lam.family


任何合作請接洽aminn613@gmail.com