2016年11月30日星期三

【揭秘!】出前一丁麻牛麵製作過程大公開

今次輪到出前一丁嘅FANS要留意啦~
機場二號客運大樓嘅童夢城通識學園入面除咗有「我的合味道工作坊」之外,仲有世界首個「出前一丁工作坊」,可以親手製作香港人好喜歡嘅麻牛麵!



由麵粉開始成個整麵嘅過程,同「我的合味道工作坊」一樣可以自己設計包裝,做完根本唔捨得拆爛包裝食咗佢!



不過由於「出前一丁工作坊」流程複雜亦較為好玩,每場大約有24人,而且每日只得3場,好似最近嘅場次已經滿咗,有興趣嘅朋友要捕住預約網站啦!

嚟到「整麵工場」最重要當然係衛生!穿上圍裙,戴好頭巾同洗手洗手洗手!基於衛生嘅理由,唔可以配戴任何首飾(包括手錶)或者塗指甲油架!




埋到工作枱見到麵粉同鹼水,首先將麵粉同鹼水拌勻(和麵),直至麵粉融合成微黃色麵團。將麵團放到工作枱,再用麵棍輕輕壓平麵團,壓到可以放入製麵機入口就OK




將壓好嘅麵團放入製麵機,慢慢轉動手抦,重覆將麵團壓14(力!),壓好嘅麵團放入膠袋等發酵,呢個時候參加者可以返埋位開始畫包裝袋!



麵團發酵之後再用製麵機壓薄,由於越壓越薄越長,所以更加要駛出力的表現!最後將勁長嘅麵放入製麵機另一邊,同樣咁攪進行手動切麵,Aminn嘅出前一丁見到初形啦!




修剪好嘅麵條會進行蒸麵工序(工作人員會代勞),呢個時候又可以返埋位繼續畫包裝袋。



麵蒸好之後,工作人員就會將麵對摺,完全就係一個出前一丁啦卦~非也!原來仲要磅重,然後將多餘嘅麵條剪走。。。嗚嗚

因為過多麵條會影響每個麵餅喺油炸過程嘅受熱程度,所以110g嘅出前一丁先合格。



工作人員之後會將麵餅放入炸架,用大約150度嘅油進行「瞬間熱油乾燥法」,呢個時候未畫完包裝袋嘅朋友就要儘快完成啦!




最後工作人員會跟次序將炸好嘅出前一丁連同味粉同埋最重要嘅麻油,放入專屬嘅出前一丁包裝袋,再用機器將包裝袋封口,Aminn呢包屬於香港人口味嘅麻牛麵客就完成啦!YEAH




「出前一丁工作坊」
門票價錢:$50 
開放時間:早上11時至下午6時正(每日共3場,逢星期三休息)
購票方法:網上預約 http://mycupnoodles.com.hk/cn/index.html 或現場購票

廷伸閱讀:【自己動手造】我的專屬杯麵 My Cup Noodles

是次小分享完畢,有興趣可按 麵語錄aminn 本站內其他分享 :)

Aminn | Beauty.Food.Fun.Travel.Trendy| 
任何合作請接洽aminn613@gmail.com

2016年11月29日星期二

【自己動手造】我的專屬杯麵 My Cup Noodles

各位合味道迷留意啦~大家每年都期待嘅「我的合味道工作坊」又嚟啦!

以後想親手做專屬嘅合味道杯麵,就唔駛專登飛去日本,日清食品喺香港開設咗「我的合味道工作坊」啦!
地點係。。。都係要去機場,哈哈!

喺機場二號客運大樓童夢城通識學園入面,1130日正式開放!

上星期Aminn去咗試玩,流程同日本嘅杯麵館係一樣嘅。
重溫:自己動手造專屬杯麵 My Cup Noodles

首先用酒精消毒雙手,跟住拎合味道杯同蓋,仲有材料單,香港嘅杯係「合味道」嚟架!




之後就搵個位坐低畫杯身,首先喺杯身寫上製造日期(當日日期)

畫咩呢?好煩呀!
不過要記得,繪畫時唔可以打開杯蓋,而且繪圖要畫喺杯身兩條金線嘅中間。
(唔可以另外加其他物料喺杯身,只可以用工作坊嘅顏色筆畫架!)
畫完之後當然要影相呃Like啦!



畫完之後填好材料單就前往配料區,總共有4種湯底同12款配料可以選擇。




Aminn揀咗咖哩海鮮味,蝦米,牛肉粒,(香港限定嘅)芝士x2



之後麵杯就會經過壓力同熱力密封杯蓋,同埋用熱力令收縮膜緊緊封口。




之後又係經過瀡滑梯就收到專屬嘅合味道杯麵喇!


最後將麵杯放入充氣袋,注入空氣之後就完成杯麵波波啦!




YEAH~完成!

註:「我的合味道工作坊」需時約30分鐘
註:如果你係外地嚟嘅遊客,就要同Aminn上次日本一樣要轉普通膠袋包裝啦~(充氣波波上唔到飛機架!)
註:遲D仲會開設日清精品店,主要售賣香港嘅日清食品同紀念品架!

「我的合味道工作坊」

門票價錢:$30
開放時間(周一至五):早上11時至下午630(每日共15場,逢星期三休息)
開放時間(假日):早上10時至下午630(每日共17場,逢星期三休息)
購票方法:網上預約 http://mycupnoodles.com.hk/cn/index.html現場購票

是次小分享完畢,有興趣可按 麵語錄aminn 本站內其他分享 :)

Aminn | Beauty.Food.Fun.Travel.Trendy| 
任何合作請接洽aminn613@gmail.com