香港人鍾意去旅行，每星期總有「返鄉下」嘅朋友喺身邊，搞到自己都心思思。以前以為入貴賓室一定要坐Business，貴賓呀嘛。原來有啲membership同信用卡優惠可以入到唔同Airline嘅貴賓室，都幾好吖！
不過香港航空貴賓室就好似無入到邊間信用卡優惠，但係佢有生日優惠呀！只要生日當日乘搭香港航空，仲可以帶2個同行朋友入去添！不過記得check in嘅時候要講明生日優惠先拎到去貴賓室嘅「boarding pass」呀～
本身我真係有想過生日當日出發沖繩，除咗想入下貴賓室，仲多個機會可能被upgrade去商務添～哈哈哈哈哈
不過因為今次同埋阿姐去旅行，香港航空係有2歲以下嬰兒機票(不佔座位)，所以見近近地去沖繩就直接訂咗商務機票，仲俾得起～
Check in嘅時候就同時拎到2張登機證(無登機資料嗰張就係貴賓室通行證！)
「遨堂」貴賓室位於「中場客運大樓」201-230登機門附近，亦即係香港航空上機嘅閘口嗰邊，相當方便。
喺門口簡單登記就可以入去，一入貴賓室就係洗手間同育嬰室，旁邊有報紙同梳化區，沿路入去仲有幾種唔同坐位區域，方便唔同喜好嘅朋友。
我自己就鍾意最尾嘅窗口位，雖然係獨立梳化位，但係環境開揚，早上過嚟又唔曬，
最緊要方便影相打卡嘩哈哈哈哈
不過最尾嘅範圍係靜音區無航班廣播，要自己留意住水牌啦～
貴賓室中間仲有公用電腦同printer方便旅客使用，旁邊仲有唔同書報雜誌，商務旅客或者等轉機嘅乘客就啱晒！
另外亦會較多家庭客(好似我哋咁)，難得出門真係會貪多少少方便買Business，而「遨堂」亦有少量玩具同足夠空間俾小朋友郁動。
入貴賓室除咗想坐得舒服之外，梗係要食個豐富嘅自助餐先上機啦(你懂的～)
首先睇睇水吧，係有bar tender調酒㗎！其他飲品都好大眾化，有咖啡、茶包/花茶、罐裝汽水、支裝水、果汁等等。
食物方面，今次嚟到係早餐時段(7am~12pm)，食物種類以輕食為主，沙律吧、三文治、烘麵包、炒蛋、茄汁豆、炒腸粉、點心，仲有幾款即叫即製湯粉麵。
羅宋湯控嘅我點咗蕃茄湯通粉，蕃茄湯尚算濃郁，不過通心粉我鍾意再淋啲。另外屋企人點咗沙嗲牛肉麵我都試咗少少，講真無茶記咁好食，但機場食物嚟講已經算好食啦哈哈哈
(12點後有即炒粉麵同即點即製雞蛋仔更吸引呀！)
呢個貴賓室仲有個吸引之處就係有提供淋浴服務，如有需要請向職員查詢同登記。而「遨堂」同香港航空商務倉洗手間都係使用L'Occitane產品，感覺的確尊貴咗。
貴賓室令原本final call fighter嘅我體驗到等上機嘅樂趣，不過而家好多Airline相繼cut細信用卡優惠內容，真係唔知下次再嚟係幾時lu！
是次小分享完畢，有興趣可按 麵語錄食玩遊記 by Aminn 或 C家重地 Be a Asterholic 其他分享 :)
Aminn | Beauty．Food．Fun．Parenting．Trendy｜
麵語錄食玩遊記 by Aminn (Lifestyle)
C家重地 (Parenting)
