麵語錄食玩遊記 by Aminn: 【在職麻媽】幼稚園面試前準備：讓孩子習慣「學校環境」

2019年11月2日星期六

【在職麻媽】幼稚園面試前準備：讓孩子習慣「學校環境」

人哋話生個大B讀書有著數，似乎都係，除咗小朋友學習能力高啲，對佛系家長都有多啲時間準備！點解咁講？話說我有幾位朋友早我幾個月生年尾BB，喺BB幾個月嘅時候就要去面試入PN！下？咁我係咪要去報？

我嗰刻先上網睇，真係嚇咗一跳！乜差3幾個月就要遲一年入學？(突然又變得好漫長...) 不過，原來PN班又唔係咁計... PN班要足2歲入學，但到暑假後班大B又未夠歲數*無得上K，變相PN要「留班」讀多年。
*根據教育局的規定，9月開學入讀幼稚園(K1)的兒童必須為2歲8個月或以上(即12月31日或以前出生)，而幼兒園/預備班(N1)的入學年齡則為滿2歲(若開學未滿2歲，須待學童生日後才能入讀)。

發覺有樣嘢好奇怪，就係級別，想當年幼稚園3年就係K1、K2、K3，而我認知嘅Pre-Nursery即係2歲班/幼兒班，但好多學校而家會咁分：
PN(2歲)＞ N(3歲)＞ Lower/LK(4歲)＞ Upper/UK(5歲)

亦有學校用N代表2歲班，之後跟返K1、2、3，所以一定一定一定要了解清楚心儀學校嘅情況先唔會錯過報名期！

講咗咁耐終於入正題，作為在職麻媽，平日已經無咁多時間陪小朋友，深夜metime認真仲邊有精力去「做功課」，我選幼稚園只有一個原則，最好就係近！屋！企！咁啱屋企樓下就有一間有PN嘅幼稚園，好喇，我嘅目標一下就考慮完畢。
接落嚟就要搵機會了解間學校，同時要了解下呢個年代「返學」係咩一回事，所以我喺小朋友8個月左右「終於」加入同區嘅媽媽WhatsApp group，方便八下區內有咩幼稚園開放日可以去參觀同玩下。