所以即使你平日扮忙又好，堅忙又好，總之很少機會上男友家吃飯，但在新年這些大日子禮貌上都要「蒲一蒲頭」。
一年先見得(一次)三幾次，當然要留個好印象比未來老爺奶奶啦！只要留意以下幾個重點，就算拎唔到高分，只少都合格有餘呀！
【忌】：兩手「fing fing」
中國人著重禮數，尤其上人屋企食飯千祈唔好兩手「fing fing」，事關咁樣係好無禮貌o架！一定會扣晒分！而且送禮絕對係一個加分位，從份禮物就睇得出送禮者有無用心思。綜合各方意見，大家都認為送食得落肚嘅就最實際，但事前最緊要問下男友未來老爺奶奶嘅口味，咁就最安全喇！
【宜】：入屋叫人
正所謂：「入屋叫人，入廟拜神。」，由細到大阿媽都教我地做人最緊要有禮貌，所以上到BB豬屋企第一件事就係同未來老爺奶奶打招呼。不論你未來老爺奶奶係傳統嚴肅型，定係和藹可親型，打招呼時嘅聲量都要拿攝準確，雖然唔洗好似包租婆講野咁大聲，不過都唔好「蚊滋」咁細聲，淨係講比自己聽！最基本係對方清楚聽到你講野，如果聲線爽朗有朝氣再加燦爛笑容就perfect喇！呀~提提大家，叫未來奶奶時千萬唔好叫「伯母」，因為「伯母」=「百無」，應該叫「伯友」至啱呀！
【忌】：赤腳
如果你唔係成日上未來老爺奶奶屋企，唔知人地屋企習慣需唔需要入屋除鞋，建議你都係唔好著啲太複雜嘅鞋，如果唔係淨係除鞋著鞋都有排搞，仲有機會令人覺得你好麻煩；而且最好就著對襪仔啦！如果要除鞋的話一來可以保暖、二來比較衛生、三來赤腳嘅時候唔會將腳印印喺地板上嘛。
【宜】：口甜舌滑
新年當然要講啲好意頭嘅說話啦！雖然新年人人都講「恭喜發財」，不過呢句潛台詞好似叫人比利是咁，所以未係最好。「身體健康」、「心想事成」、「萬事勝意」、「一帆風順」、「大吉大利」、「新年進步」等都係不錯嘅大路選擇。如果想講同馬年有關嘅恭賀語又唔想來來去去都係「馬運亨通」、「龍馬精神」咁悶，「馬上變靚」、「馬上有錢」等嘅創意祝賀語，對方聽得開心又有新意！
【忌】：「Auntie, 我飽喇！」
通常拜年時主人家都會好好客，煎一大堆年糕、蘿蔔糕、馬蹄糕、芋頭糕等等招呼你，但唔夠三個鐘又話開飯，通常晚飯菜式都好豐富，5個人食10個餸又湯又糖水又生果咁！若然你同Auntie講「飽喇！」，咁阿Auntie有機會覺得你「(普通話)不給面子」架喎！如果裝少啲飯，又可以可以樣樣都食少少，咁就唔會怕得失阿Auntie，仲有就係萬一餸菜唔啱食，可以拿拿聲K.O.佢吖嘛！
【宜】：多多交流
初次到訪入到屋又未夠鐘開飯，無可能同男友一齊哩係房等食飯先上黎架嘛！咁樣都唔係幾禮貌嘅~但係大家坐係度唔通玩手指咩？作為一個優質嘅準新抱仔，當然要同未來老奶奶傾下偈啦！不過一定要嚴選話題，政治就最好唔好喇~萬一大家立場唔同就大鑊了！最好都係講下天氣，講下劇集，風花說月下就夠架喇！
沒有留言:
發佈留言