麵語錄食玩遊記 by Aminn

2018年4月3日星期二

【孕記重溫】聖保祿醫院順產生B記（1）：入院篇

就喺放產假嘅第二個星期，個囡喺臨天光6am終於嚟到門口啦！

明明之前睇啲報告話多數媽媽會見紅或者宮縮先，得1x%係穿水先，咁都畀我中，無得沖埋涼先閃仲要盡快摷埋老公起身一齊走佬！由於我去私院生，所以無得call白車，好彩都好順利call到的士。「口裡說不，身體卻很誠實！」話唔緊張就假嘅，我哋兩個上咗的士就一直無出聲，師傅可能感覺到我哋沉默嘅氣場，15分鐘就由將軍澳到St. Paul！

落車即刻上產科「報到」！老公填緊表嘅時候我就同姑娘對文件，之後就安排咗我去胎監（即係check BB心跳、胎動、宮縮度數），再之後姑娘就幫我檢查係咪真穿水同子宮頸開咗未（姑娘/醫生都係用手指伸入去檢查開咗幾多度，同埋摸唔摸到胎頭），姑娘話只係得1度，oh～啱啱開門乍。。。

由於我中咗個B鏈，加上又穿水先，所以一入院就要打抗生素，同埋一陣到產房就會打埋催生，都好嘅～速戰速決！另外一邊手就要抽埋血，一入院已經吉咗幾支針，其實心情上無乜特別，因為同跟住要面對嘅人生大事「生仔」只係雞毛蒜皮嘅事。。。

講開又講，我去醫院嘅時候只係整咗一塊特長夜用，原來係幾危險！危在原來我初頭嘅漏尿、滲尿只係少兒科！我檢查完起身嗰下係好似瀨屎咁！！！好彩去到醫院已經有晒床墊盛盛，唔係真係搞唔掂！

檢查晒都8點幾，姑娘安排我入房安頓咗先，我選咗最經濟嘅4人標準房，房入面有2個廁所（其中1個有浴室），仲有冷熱水機、free wifi，而每個床位都有獨立電視、插頭、儲物衣櫃同匣萬。

廁所：

床位：

個人空間多少少，所以我只係拎咗個細小嘅走佬袋，有齊入院文件、化妝袋、衛生用品同少量食物，其他住院嘢就放喺「走佬喼」，就係平時用嚟hand carry嘅細喼一個。

老公就衝去對面買早餐畀我，我仲以為主診醫生無耐就到，點知話中午先到，姑娘就叫我去換網褲同3塊衛生巾，3塊！！？原來對付嗰啲瀨屎咁流出嚟嘅羊水，就要前後一塊上面再疊多塊咁樣3塊厚厚墊住先接得住，真係長知識！

說時遲那時快老公已經買咗魚柳包畀我（臨生仔識食梗係食老麥！XD），佢嗱嗱聲食完幫我收拾埋就返屋企幫我拎埋「走佬喼」過嚟。其實我當時又未痛，就開始玩電話、通知朋友同事。

聖保祿生仔套裝已經包括以下住院用品：

孕婦衛生巾、網褲、床墊、沖洗瓶

毛巾仔、牙刷牙膏、沐浴露、漱口杯、梳

紙杯、飲管、面紙

基本上入院只需要準備：

－入院信、驗血報告同其他相關報告、醫院按金收據同丈夫身份證副本（如果丈夫一齊入院就直接畀正本）

－個人護膚品（我帶咗潔面濕紙巾、保濕乳液、保濕精華、BB Cream、潤唇膏）

－睡衣（開胸睡衣方便餵人奶）

－拖鞋

－手機同charger

－清毒濕紙巾

－BB同自己出院衫（可以叫屋企人喺出院當日先拎嚟，因為我用喼所以帶埋）

St. Paul仲包咗每朝7點送嚟嘅早餐（有3款揀！），方便埋會送飯嘅家人，邊有屋企人咁早就送早餐嚟呀～係咪！

喺私院一定唔怕餓親，因為有Menu等緊你！都係茶餐廳/快餐店嘅食物同價錢，原來都幾經濟㗎啵！

（續）

是次小分享完畢，有興趣可按麵語錄食玩遊記 by Aminn 或 C家重地其他分享 :)

Aminn | Beauty．Food．Fun．Travel．Trendy｜

麵語錄食玩遊記 by Aminn (Lifestyle)

www.facebook.com/m.for.aminn / www.instagram.com/starzaminn

C家重地 (Parenting)
www.facebook.com/sy.lam.family

任何合作請接洽：aminn613@gmail.com

2018年3月4日星期日

【快手出門】英國護髮品牌新品 Aussie Dry Shampoo免沖水洗髮噴霧

春天天氣潮濕頭髮痴笠笠、夏天流汗頭皮出晒油、冬天凍冰冰又唔想洗頭，Dry Shampoo絕對幫你趕時間又可以解決頭髮黏笠嘅懶人之選！

Kool Kiwi Berry(左)令你散發清新果香，Boost me up!(中)為秀髮塑造豐盈飄逸，Clean Supreme(右)有超強潔淨力

早前收到英國No.1護髮品牌Aussie最新推出嘅Dry Shampoo免沖水洗髮噴霧，啱晒最近要坐月唔可以(經常)洗頭嘅我！

重點推介呢支超強潔淨力嘅Clean Supreme，含有天然成份荷荷巴油，可以分解頭髮同頭皮上嘅油脂同時做到滋潤保濕。

用法好簡單，先搖勻後喺距離30厘米噴向頭皮同髮根，再用指尖均勻按摩頭皮，之後用手梳理就可以。

有別於其他粉末狀嘅Dry Shampoo免沖水洗髮產品，如果按摩或梳理得唔均勻，反而會有錯覺以為有頭皮，造成反效果。

Aussie Dry Shampoo免沖水洗髮噴霧，可以快速乾洗頭髮無須過水，簡單幾個步驟就能夠潔淨頭髮、除油除臭，連造型都可以用Aussie Dry Shampoo搞掂哂！

Aussie Dry Shampoo仲推出埋65ml便攜裝，放喺手袋隨時隨地都可以用，幾時都唔使擔心出現尷尬情況啦！

而家仲有限時$20優惠送畀你：https://goo.gl/fMCFUL << click :)

是次小分享完畢，有興趣可按麵語錄aminn 或本站內其他分享 :)

Aminn | Beauty．Food．Fun．Travel．Trendy｜

麵語錄食玩遊記 by Aminn (Lifestyle)

www.facebook.com/m.for.aminn / www.instagram.com/starzaminn

C家重地 (Parenting)
www.facebook.com/sy.lam.family

任何合作請接洽：aminn613@gmail.com

2018年1月18日星期四

【網紅店燒到嚟】台式早餐店桃園眷村登陸香港！

來自上海嘅早餐品牌網紅店「桃園眷村」早前已經登陸香港，地點就係朗豪坊原Mos Burger位置。桃園眷村賣嘅係台式古早味早點，主打鮮製豆漿、古法手工燒餅、油炸鬼，三年前喺上海開張，而家已經發展到全中國有超過30家分店，真係個個都去打卡，唔通個個都專登去打卡咩！

桃園眷村裝潢用上文藝風，牆身簡約乾淨，店入面嘅「時間，在舌尖」充滿文藝腔，呢種台灣文青氛圍，無疑是近年大熱嘅中港台餐廳包裝。

香港租貴地方有限，所以嚟到香港就要走快餐風，店入面以開放式設計，而且要用再生紙杯紙碗嚟節省清潔時間，加上位置連室外位，基本上都唔太需要等位。不過就無咗碗底嘅文青短詩，呢方面就差咗少少。

國內店環境

你可能會覺得桃園眷村賣嘅豆漿、油炸鬼都係普通嘢，不過原來都係店內用獨門方法每日鮮製現磨！而且豆漿豆味清新，甜度仲可以按口味加減。

除咗鹹、甜豆漿之外，豆花都有鹹、甜畀你揀！我就試咗鹹豆花（$32）配菜有菜脯、蝦皮、紫菜、葱末。第一啖好特別，就係好多香口配料嘅滑豆腐咁囉，不過口感的確出奇過癮。

另外飲品仲有米漿、紅茶豆漿、紅棗豆漿選擇。

香港人習慣用油炸鬼配粥，喺台灣同江南等地就用嚟配豆漿，不過今日好似已經賣晒。。。（桃園眷村的確每日都有部分食物係唔提供㗎！）

桃園眷村第三寶就係手工燒餅，燒餅就係傳統台式芝麻燒餅，新派做法就將佢切開再放配料，芝士、沙律菜、燒雞扒、炸魚柳等等。今次就試咗芝士蛋燒餅（$42），燒餅脆卜卜，如果可以熱啲，啲芝士有少少溶就好喇！卡卡～

另外功夫辣雞腿燒餅、燒餅油條蛋、豬排蛋燒餅都係推介喔！

桃園眷村除咗三寶之外，我仲好喜歡食即包粢飯，餡料好豐富㗎！唔同上海鋪嘅獨孤一味得肉鬆油炸鬼粢飯，所以我就點咗青瓜肉鬆飯糰（$34），除咗青瓜之外，仲有炸到卜卜脆嘅肉鬆同增加口感嘅菜脯。如果想試下台式啲嘅口味可以食台式香腸葱蛋飯糰同肉燥滷蛋飯糰㗎！

是次小分享完畢，有興趣可按麵語錄aminn 或本站內其他分享 :)

Aminn | Beauty．Food．Fun．Parenting．Travel．Trendy｜

Lifestyle：www.facebook.com/m.for.aminn / www.instagram.com/starzaminn

Parenting：www.facebook.com/sy.lam.family
任何合作請接洽：aminn613@gmail.com

2018年1月1日星期一

【親子健康】Puracyn®Plus OTC倍療善家用消毒好幫手

日常生活入面經常接觸到細菌同病毒，好多人都會隨身必備酒精搓手液或者消毒濕紙巾，而唔少父母都會經常提醒小朋友要多洗手。但係有藥劑師指出，坊間對「消毒殺菌」普遍存有唔少誤解，其實可能會令病毒（流感、手足口病毒、EV71型腸病毒、沙士輪狀病毒等）更加有機可乘！

經常使用高濃度嘅酒精產品好容易造成肌膚乾裂粗糙，有機會令雙手流失皮膚上的皮脂同水份從而引致敏感，或者小朋友喺用完之後末乾就搓眼，亦有可能會引起結膜炎或者令角膜受損。

目前香港市面上嘅消毒產品，較少含HOCl（次氯酸）嘅產品，但原來喺台灣、日本等地區反而好流行！HOCl除咗可以作為傷口消毒醫藥用品之外，仲適合嬰兒、孕婦使用，可以用喺面部或者敏感性皮膚。集清潔傷口、消毒同傷口癒合功能於一身，仲有效針對長期傷口，都可以作為消炎藥用。

其實當身體有細菌入侵嘅時侯，身體其中一種主要嘅白血球（中性粒細胞 Neutrophil），會釋放HOCl嚟殺菌同消毒。倍療善Puracyn含有嘅HOCl次氯酸嘅酸鹼值同人體皮膚相近，仲可以殺死酒精對付唔到嘅病毒同減低引起皮膚敏感。作為新一代傷口護理專家，無抗生素、類固醇、酒精或者碘酒，性質溫和但可以迅速殺滅大部份病毒細菌，無需混合或者稀釋就可以直接使用。