【新派上海菜】軒尼詩的「手製拉麵」

無心插柳遇到軒尼詩的江南 上星期原本出灣仔食上海菜放題，中間遇到一啲事，陰差陽錯路過好久以前嘅壽司鋪已經華麗轉身成為上海菜，見到門面幾乾淨就走咗入去，裝修幾光猛，一入去見到中間張bar枱，不過入面無乜人！

睇下個餐牌，基本上海蘇杭地道食物都有，拉麵、包點、小食同小菜，餐牌註明會用上「手製拉麵」！

門口入嚟就見到師傅喺度拉麵同整小籠包。

最喜歡點拼盤，啱晒想試晒唔同口味嘅我！

最後點咗醉雞、醉豬手同雞絲粉皮。酒味尚算可以，醉雞肉質唔鞋，尚算滑溜。豬手就未夠入味，不過豬皮夠厚夠爽。雞絲粉皮其實無乜特別驚喜，已經係喺街食到比較好嘅雞絲粉皮。

而個擔擔炸豬扒麵呢，炸豬扒係另上嘅，炸得幾乾身，豬扒剛剛炸起仲算juicy，放涼咗就開始乾。

呢度嘅手製拉麵有驚喜，係師傅即場拉嘅拉麵，麵條口感好好，唔敢講好彈牙但有咬口唔係淋身。仲有擔擔麵個花生麻醬，加咗辣味咁先夠蘇杭嘛～不過略嫌湯底唔夠厚身。

But手製拉麵必食！

食上海菜又點少得小籠包？

姥姥小籠包皮夠薄，肉餡夠鮮甜不鬆散，不過可能湯汁唔夠，未夠飽滿感。

話說Aminn好鍾意食葱油餅，見呢個圓碌碌咁趕緻就叫咗，點知一咬之下咁厚皮嘅？其實佢真係好似Donut咁，將蔥餡集中咗喺中間，油蔥勁香勁濃郁！不過呢，Aminn都係喜歡較乾身嘅葱油「餅」。

以灣仔人來人往嘅軒尼詩道嚟講，假期一點左右已經開始等位，而且上海姥姥勝在大眾化價錢坐得舒適，真心抵贊！

是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn

任何合作請接洽: aminn613@gmail.com

【唱走寂寞～】52Hz, I Love You

出席《52Hz, I Love You》（52赫茲，我愛你）優先試映場之前，只喺網上見到一啲拍攝同訪問片段，完全唔吸引的說，不過就憑執導嘅魏德聖導演，拍攝《海角七號》、《賽德克‧巴萊：太陽旗》、《賽德克‧巴萊：彩虹橋》、《KANO》等台灣熱片嘅「魏德聖」，就答應出席試映場。

 

「孤單，只是故事的開始！」《52Hz, I love you》喺台灣會安排賀歲檔期上映，香港就會隨後安排喺情人節檔期上映！

 

電影用咗鯨魚同貓嚟形容每個城市裡都有感到孤單又渴望愛情嘅人，52Hz鯨魚係世上最孤獨嘅鯨魚，因為佢嘅頻率同其他種類嘅鯨魚搭唔上，所以永遠唔會得到其他「鯨」嘅回應。而貓就係「一個有戒心嘅普通人」，不過世事無絕對，52Hz鯨魚都會遇到貓。

 

簡單嚟講，52Hz係一部關於現代愛情嘅音樂電影，而且加入《海角七號》主要演員客串演出，配合好多音樂元素，以一連串彩蛋將2月14日情人節一整日所發生嘅事喺一套電影呈現。

 

大家都唔係好了解吧～放一啲電影彩繪俾大家睇下先！

 

話說，到正式上映前一個月，終於出現電影預告啦！（香港版預告：https://youtu.be/O5JFzjbzeJc）

 

2017年唱走寂寞～

 

 

是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn

任何合作請接洽: aminn613@gmail.com

【麥樂雞料理】雞，全部都係雞

每次麥當勞推出麥樂雞優惠，無論係買一送一，定係十蚊9件，都會引發全城叫雞熱潮，明明老麥總有間喺左近，都可以賣到斷市！

我諗。。。因為香港人都大愛麥樂雞料理！（創意食譜：Aminn / 食譜原圖：網上圖片）

1) 咕嚕麥樂雞球

材料：麥樂雞、菠蘿、青椒

醬料：甜酸醬

做法：煎香材料，加入甜酸醬快炒，完成

2) 串燒麥樂雞

材料：麥樂雞、菠蘿、洋蔥、青椒

醬料：燒烤醬

做法：串起材料，加入燒烤醬明火燒，完成

3 ) 咖哩麥樂雞

材料：麥樂雞、薯仔、洋蔥、甘荀

醬料：星洲咖喱醬

做法：煎香材料，加入星洲咖喱醬煮熟，完成

4) 迷你麥樂狗

材料：麥樂雞、酸瓜、生菜、茄汁、迷你熱狗包

醬料：蜜糖芥末醬

做法：煎香麥樂雞，放入迷你熱狗包，加入生菜、酸瓜、蜜糖芥末醬、茄汁，完成

5) 韓式麥樂鍋

材料：麥樂雞、豬柳漢堡扒、火腿扒、芝士、茄汁豆、泡菜、辛辣麵

醬料：韓風辛辣醬

做法：將材料放入鍋中，加入韓風辛辣醬煲至水滾，完成

越諗越想整，歡迎贊助材料。。。麥樂雞料理完勝！


是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn
任何博客合作請接洽: aminn613@gmail.com

【童年回憶小笨象】小新點心Last Calling！

標榜萌爆廣東點心嘅「点心代表」早排推出多款蠟筆小新「心點」，除咗有小新出現之外，仲有小新屋企人，美冴、廣志、小葵同小白，同埋一班好朋友，正男、阿呆、妮妮，Aminn趕到尾班車去探探野原家！

餐廳環境貫徹主題，由門口開始已經鋪天蓋地係蠟筆小新蹤影。無論係掛畫定係玻璃貼紙全部都係小新同朋友仔嘅蹤影，成間餐廳都係打卡位！

一坐低見到本Menu成本漫畫咁精美！點心仲分成「搗蛋篇」同「被打篇」，好過癮囉！

重口味嘅Aminn當然要玩下点心代表嘅超萌蒸包，另外仲點咗幾樣點心麵食，其實点心代表真係賣點心架！

不理不理左衛門奶黃流沙包($49) 用筷子拮穿不理不理左衛門鼻哥窿，豬仔仲會流鼻。。。最啱post相呃like！

大象朱古力流沙包($49) 朱古力流沙餡好有香濃朱古力味，同中式蒸包就唔係好夾混，不過有小新嘅小笨象同裸背，今次媽媽一定唔會發嬲嘅！

蠟筆小新點心系列供應到2017年1月17日乍～大家趁仲有時間快啲去探小新啦！

点心代表嘅點心以即叫即做，確保客人可以品賞到最新鮮嘅美味，另外將潮流加入菜單，打造新派點心，Aminn仲點咗鮮蝦菜苗餃($29)、安格斯牛肉腸($39)、乾炒安格斯牛河($69/只限中環店)，估唔到喺中環用呢個價錢都飲到餐茶，而且兩款安格斯牛點心都無失望！





不過用呢款茶包沖出嚟嘅清茶(茶位$10@)就差咁啲喇！

是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn

任何合作請接洽: aminn613@gmail.com