【薯不簡單(下集)】假期無限好 起身已黃昏

重溫：【薯不簡單(上集)】主打窩夫美式小店

 

新年假期好多店都未開，或者加二加三收費，早幾日出銅鑼灣，第一時間就諗起明珠廣場嘅Green Waffle，11月幫襯嘅時候店員已經話將會搬到希慎，所以二話不說喺地鐵站直上13樓。新店以半開放式設計，就喺商場窗邊位置，又開揚又光猛。

 

今次過嚟食個Late Brunch，就點咗咸牛肉三文治同芝士焗通粉，當然仲有雜莓香蕉窩夫都係後上啦！

 

今次點咗全份美式咸牛肉三文治，同樣嘅脆薄三文治包、咸牛肉片、酸菜、沙律汁，配搭意式醋沙律菜。轉咗用麵包板即刻加咗田園感，不過咸牛肉片咸咗(?)，同埋轉咗配薯條唔係脆脆薯粒嘅！

 

另外點咗芝士焗通粉，配料就只有煙肉粒。

嘩～Cheese Lover一定大愛呀！芝士多到呢～仲有拉絲！拉絲！拉絲架！

芝士粘住喺通粉表面，芝士味濃郁到一個點，兩個人Share都有少少漏呢～

 

Encore雜莓香蕉蕎麥窩夫，雖然可以加$20轉Movenpick雪糕，不過我覺得阿波羅朱古力雪糕都好夠朱古力味呀！

強烈推介蕎麥窩夫，健康啲之餘仲可以增加飽肚感，食多咗都無咁內疚，哈哈！

 

食得早餐當然要點埋Aminn"must have"嘅咖啡，飲返杯Americano同Latte，再食啖窩夫，咁先夠美式嘛！

 

 

是次小分享完畢，有興趣可按 麵語錄aminn 或本站內其他分享 :)

 

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn

任何合作請接洽: aminn613@gmail.com

 

【薯不簡單(上集)】主打窩夫美式小店

幾個月前有次放工去逛銅鑼灣，晚飯時間差不多過先肚餓，又無咩idea就上網搜尋一下附近特色食店，搵到間主打窩夫嘅Green Waffle Diner，諗住輕食都可以就去試試。

 

點知呢個時間仲要等位！睇嚟窩夫真係熱賣喎！

等位其間睇下Menu先，發現除咗窩夫之外仲有好多主食，全日早餐三文治、鑊仔薯粒等等都有幾十款選擇。

最後點咗香辣番茄香腸薯粒鑊仔同咸牛肉三文治，雜莓香蕉窩夫就後上。

 

估唔到鑊仔薯粒份量咁多！

熱辣辣鑊仔，好多脆脆薯粒，仲有腸仔同番茄、墨西哥辣椒，加上流心蛋，撈勻流心蛋黃就可以食啦！

每一啖都係濕潤嘅脆脆薯粒，呢個份量好有飽足感。

 

另外點咗半份美式咸牛肉三文治，脆薄三文治包、咸牛肉片、酸菜、沙律汁，簡簡單單味道清新，唔會太飽滯，又係配搭脆脆薯粒喎！

 

見到有夏日特飲，就試下黑白配，Snow White同Bailey's Chocolate。

Snow White係椰子菠蘿smoothie，口感幼滑，仲有一支小小嘅菠蘿冰，搞住飲又得，就咁食亦得，得咗！

而Bailey’s Chocolate就係朱古力沙冰。

 

最後嘅雜莓香蕉窩夫，我轉咗做蕎麥窩夫，配朱古力雪糕。

窩夫外脆內鬆軟，蕎麥窩夫可以增加外層脆度，仲增加飽肚感添！

雖然仲有雪糕，不過配搭埋新鮮水果，Share食份量剛剛好，都唔係好肥啫！

 

餐廳係半開放式鋪位，剛啱坐喺商場行人路旁邊，環境未算十分舒適，不過地方算寬敞，食物質素有驚喜！

 

是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn

任何合作請接洽: aminn613@gmail.com

【周末好天氣】銅鑼灣海景Brunch好位置！

趁好天氣同朋友嚟個海景Brunch！

嚟到銅鑼灣Les Saveurs Private Kitchen，望出去就係紅隧口，天朗氣晴日子可以由東至西見晒成個維港景！

餐廳本身係開放式，不過裝有流動層板，想要多啲私隱都輕易安排到唔同大小嘅廂房。

先嚟個麵包籃，好精緻嘅法包同牛角飽，好鬆軟香脆，唔塗牛油都好好食！

Menu有啲係法文(!?) 唔緊要！店員會貼心地先解釋再落order！

留意返，店入面嘅碟有幾個動物款式，又幾Kawaii喎！

頭盤每人選一款，炸蝸牛波波加上香芹蒜蓉牛油好惹味，賣相有點分子料理嘅感覺。

另一款頭盤係象拔蚌，質感夾口，一啖放入口好滿足，仲有西洋菜泡沫，配搭沙律菜都好好味。

主菜我選咗42度煙燻三文魚(+$88)，上菜嘅時候用玻璃蓋冚住，喺客人面前繼續煙燻，大概兩分鐘後店員打開個蓋，走出嚟嘅煙燻效果勁Artistic！

煙燻三文魚配搭黑魚籽感覺勁華麗。切開慢煮三文魚，肉質油潤鮮嫩，滑到不得了！配鹹香黑魚籽，鮮味出晒嚟！

醬汁用上紅菜頭蓉，旁邊仲有幾粒蘋果辣薑汁啫喱，又幾清新喎！

另一款主菜選咗龍蝦天使麵，主角除咗龍蝦肉之外，仲有龍蝦Cappuccino包住天使麵，每條天使麵都索晒鮮甜龍蝦汁，不過份量偏少，真係唔係幾夠喉！

之後到是日餐湯—雅枝竹忌廉湯，店員先上一隻吉碟(!?)，

再以茶壺即席倒出熱嘅忌廉湯，飲嘅時侯將伴碟嘅雅枝竹脆同乾火腿拌落去一齊飲，忌廉湯打得細滑，餐湯每日都唔同架！

甜品方面，檸檬蛋白撻賣相好靚，檸檬味道清新，配搭雜莓雪芭酸酸甜甜效果好夾。

另一款係朱古力慕絲蛋糕，朱古力味好濃，配搭同樣香濃朱古力雪糕，朱古力Lover一定大愛！

兩款甜品，一個輕怡一個重口味，任君選擇，甜品迷都唔會失望！

法國菜當然要慢慢享受，同朋友嚟慢慢傾絕對可以令人放鬆心情，而且午餐四道菜只係$238，食呢個景+法國菜絕對超值！

是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn

任何合作請接洽: aminn613@gmail.com

【金記電車站】金記冰室分店。越來越好玩

早兩個星期趁假期前空檔，

終於約到幾個Friend子晚飯，竟然又係去金記冰室，

原來新店開到去銅鑼灣時代廣場附近，呢間分店勁就腳喎！

呢間金記冰室分店位於銅鑼灣霎東街，

即係好久以前電車廠嘅所在地，冰室配合「電車站」主題，

喺店內正中有「一架」仿製電車，係往金記嘅原址「筲箕灣」，

店內裝修亦充滿懷舊感超有心思，啱曬 Selfie控post相呃Like啦～

我哋點咗晚飯小菜套餐，包中湯或者羅宋湯，仲有白飯同飲品。

意想不到冰室到竟然有原條蒸魚，梗係要order啦！

仲叫左幾個中式小炒，京蔥蜆介雞皇、XO醬茄子牛仔骨 、蒜蓉炒西蘭花。

估唔到去冰室上至茶餐小食，下至晚飯小菜，中式西式都有，真係嚇親寶寶！

題外話，熱飲杯印咗舊香港建築，好可愛囉～心心眼

凍飲揀菠蘿冰同凍檸賓都唔錯喔～

是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn

任何博客合作請接洽: aminn613@gmail.com