以後想親手做專屬嘅合味道杯麵，就唔駛專登飛去日本，日清食品喺香港開設咗「我的合味道工作坊」啦！
地點係。。。都係要去機場，哈哈！
喺機場二號客運大樓童夢城通識學園入面，11月30日正式開放！
上星期Aminn去咗試玩，流程同日本嘅杯麵館係一樣嘅。
重溫：自己動手造專屬杯麵 My Cup Noodles
首先用酒精消毒雙手，跟住拎合味道杯同蓋，仲有材料單，香港嘅杯係「合味道」嚟架！
之後就搵個位坐低畫杯身，首先喺杯身寫上製造日期(當日日期)。
畫咩呢？好煩呀！
不過要記得，繪畫時唔可以打開杯蓋，而且繪圖要畫喺杯身兩條金線嘅中間。
(唔可以另外加其他物料喺杯身，只可以用工作坊嘅顏色筆畫架！)
畫完之後當然要影相呃Like啦！
畫完之後填好材料單就前往配料區，總共有4種湯底同12款配料可以選擇。
Aminn揀咗咖哩海鮮味，蝦米，牛肉粒，(香港限定嘅)芝士x2
之後麵杯就會經過壓力同熱力密封杯蓋，同埋用熱力令收縮膜緊緊封口。
之後又係經過瀡滑梯就收到專屬嘅合味道杯麵喇！
最後將麵杯放入充氣袋，注入空氣之後就完成杯麵波波啦！
YEAH～完成！
註：「我的合味道工作坊」需時約30分鐘
註：如果你係外地嚟嘅遊客，就要同Aminn上次日本一樣要轉普通膠袋包裝啦～(充氣波波上唔到飛機架！)
註：遲D仲會開設日清精品店，主要售賣香港嘅日清食品同紀念品架！
「我的合味道工作坊」
門票價錢：$30
開放時間(周一至五)：早上11時至下午6時30分(每日共15場，逢星期三休息)
開放時間(假日)：早上10時至下午6時30分(每日共17場，逢星期三休息)
購票方法：網上預約 http://mycupnoodles.com.hk/cn/index.html 或現場購票
是次小分享完畢，有興趣可按 麵語錄aminn 或本站內其他分享 :)
Aminn | Beauty．Food．Fun．Travel．Trendy｜
任何合作請接洽: aminn613@gmail.com
