【在職麻媽】入幼前準備：讓孩子習慣「學校環境」

最初考慮報唔報playgroup嘅時候，最大原因因為自己係在職媽媽，平日奶奶幫手湊囡，始終唔係自己湊無得要求咁多，而我又想個囡有機會同同齡小朋友多啲互動，都有留意下附近有乜playgroup，有開放日啱時間嘅就同個囡去玩下咁。

playgroup有平有貴，但絕對唔係必須，唔同學校嘅收費都可以有一段距離。就喺我未有決定嘅時候，喺媽媽群組知道我心儀間幼稚園原來有playgroup，而且同區嚟講算平，就趁佢開放日帶埋個囡去玩去參觀，順便問埋老師關於報名方法同之後升K嘅問題，終於經歷好多媽媽講嘅留電話報名(留位)，緣分到自然有位。
講咗咁耐終於入正題，作為在職麻媽，平日已經無咁多時間陪小朋友，深夜metime認真仲邊有精力去「做功課」，我選幼稚園只有一個原則，最好就係近！屋！企！屋企樓下就有間有PN嘅幼稚園，好喇，我嘅目標輕易考慮完畢。
接落嚟就要搵機會了解呢間學校，同時要了解下呢個年代「返學」係咩一回事，所以我喺小朋友8個月左右先加入同區嘅媽媽Whatsapp group，方便八下屋企附近嘅幼稚園開放日資料。


終於等到心儀學校開放日，仲同小朋友報埋playgroup(電話留位先～仲要排隊..)，希望佢去玩順便熟習呢度嘅環境，留意返，係「學校環境」！


我小朋友喺14個月就開始返playgroup，每星期2堂，都係一齊唱下歌仔、捉手仔做下勞作、玩下水、同玩下遊樂區咁，體驗一定多過留喺屋企。


以下小貼士純屬個人意見：
貼士1：留意區內幼稚園開放日，就到時間就去，預早俾小朋友接觸「學校」呢樣嘢
貼士2：留意心儀幼稚園開放日，盡量安排時間去，可以直接到學校查詢想知嘅問題 貼士3：如果心儀幼稚園有playgroup或者其他班可以考慮下報名，俾小朋友熟悉心儀學校環境，減少面試日膽怯嘅機會

大家有時間都要考慮下希望小朋友將來喺咩學習環境成長，早少少去了解你心儀嘅學校，跟住緣份到你就會順利報名，哈哈

是次小分享完畢，有興趣可按 麵語錄食玩遊記 by Aminn 或 C家重地 Be a Asterholic 其他分享 :)

Aminn | Beauty．Food．Fun．Parenting．Trendy｜ 

麵語錄食玩遊記 by Aminn (Lifestyle)

www.facebook.com/m.for.aminn 

www.instagram.com/starzaminn 

C家重地 (Parenting) 

www.facebook.com/sy.lam.family　

任何合作請接洽：aminn613@gmail.com

【黃色經濟圈】黃子華唔夠「黃」，重要咩？

子華神又有新戲上，本質上，又係玩藝術之作。藝術嘅嘢，各人領略唔同。

經典之作2002年《一蚊雞保鑣》，係子華神首部編導演之作，點知成為「爛片」一套。而其他子華神主演嘅電影票房亦強差人意。子華神嘅演技、gag係毋容置疑。

睇唔明咩？只怪自己connect唔到。
今個新年迎嚟子華神另一套編導演之作《乜代宗師》，亦係對黃色經濟圈嘅挑戰。 有人之前吹《乜代宗師》係「藍」因為呢套戲有部份喺深圳拍丶兼子華神喺呢段時間無表過態，所以要杯葛。 喺黃色經濟圈入面，「黃」定義何其闊，經過半年嚟緊磨合，大致得出一個無結論嘅結論－「客觀」機制，任何人都有心目中「黃」嘅定義，既然兄弟爬山，目標只有一個，主力只幫襯自己認為嘅「黃店」就對了。 在此，同班鍾意「鬥黃」嘅手足講一句：為鬥而鬥，你永遠都唔夠黃。
講返子華神，睇過佢棟篤笑嘅香港人必定知佢咩取態，係神級，無懸念。（歡迎到 黃子華 Dayo Wong 棟篤笑 - 官方頻道 重溫：https://www.youtube.com/user/tzewahofficial）
子華神喺過往棟篤笑經常批評香港政府、甚至共產黨。
有幾耐？遠古到香港回歸前咯～

子華神一直都係量產演藝人，佢每次talk show都滿座，你就以為佢搵到錢？佢應該同啲老餅家一樣，每年賺一次錢就夠洗一年。佢未必需要為錢操心，但都毋須為錢跪低。 明眼人都知香港市場細，但電影製作成本高，所以無老闆會投資純香港電影。想賺到錢，就要為人民服務。子華神上一套《棟篤特工》就係合拍片，結果大收四千萬。
今次子華神為降低成本，部分大型場口返大陸拍、碌人情卡叫人收平啲，總之製作團隊都有糧出皆大歡喜。原來因為套戲臨開拍英皇先撤資，子華神決定自己硬食做埋製作人，以有限資源，你覺得用乜可以撐起整個製作團隊？係愛？定係責任？ 因緣際會，《乜代宗師》而家係絕對Made by HongKongers、Made for HongKongers，唔就係黃色經濟圈第一步咩？
無錯，單憑香港人係無可能令《乜代宗師》大收，但係唔撐，以後更加少機會有本地電影。黃色經濟圈唔係口號，而係一個形態，要俾投資者知道，香港人嘅錢係可以影響市場，只要你有心為香港人服務，係會有回報嘅。 總結：黃子華係名符其實嘅「香港人」，癲嘅、喪嘅，賣樓為夢想嘅「一個傻佬」

是次小分享完畢，有興趣可按 麵語錄食玩遊記 by Aminn 或 C家重地 Be a Asterholic 其他分享 :)



Aminn | Beauty．Food．Fun．Parenting．Trendy｜ 

麵語錄食玩遊記 by Aminn (Lifestyle)www.facebook.com/m.for.aminn www.instagram.com/starzaminn 

C家重地 Be a Asterholic (Parenting)
www.facebook.com/sy.lam.family


任何合作請接洽：aminn613@gmail.com